Мировно образование

Усно изразување – техника АКВАРИУМ

mojataucilnica Деветто, Изразување и творење IX, Мировно образование, Училишни активности, на час

Под импресии од несекојдневните тренинг-обуки од последната средба, дел од проектот „Поддршка во процесот на интегрирано образование“, решив, без некој особен интузијазам да ја работан на час техниката аквариум. На почеток не ми изгледаше толку интересна, и немав намера да ја искористам, но колегите учесници на тренингот споделуваа дека ја искористиле и дека имаат многу убаво искуство… и мотивирана од тоа, решив да се обидам и јас.

Наставна единица Усно изразување: техника аквариум
Одделение XI (деветто) одделение
Време на реализација Октомври, 2016 год.
Наставно подрачје Изразување и творење
Тип на часот Час за примена на стекнати знаења
Цели на часот Да се подобри усното изразување, да се поттикнат ученците на креативно размислување, да се охрабрат во искажување на нивите ставови, да го збогатат речникот, да размислуваат и дискутираат на МИО теми.
Форми на работа Групна, мали групи од 4 ученици
Наставни методи и техники
 Дијалошки метод, техника: аквариум
Наставни средства и материјали Листови со теми, четири столици, училница, табла, часовник.
Корелација Општество, култура, спорт, музика…
Поими

аквариум

На средината од просторијата се поставуваат четири столици кои формираат замислен аквариум. Се повикува доброволец кој сака да дискутира на одредена тема. Темите се претходно зададени и се отпечатени секоја на посебен лист хартија и се лепат на табла.

Доброволецот ја зема темата на која сака да дискутира и ја поставува на средина на аквариумот на под. Тој/таа може да повика некој со кого сака да дискутира на темата, а останатите слободно се приклучуваат на останатите слободни столчиња во „аквариумот“. Во текот на вежбата можат да говорат само оние кои во тој момент седат во „аквариумот“.

Кога некој посака да зборува, се приближува до столиците и го допира по рамото оној/онаа на чие што место сака да влезе во „аквариумот“.  Ученикот/чката може да ја заврши реченицата, а потоа мора да му/ ѝ отстапи место.

Кога ќе се заврши разговорот на една тема (или по поминатото време предвидено за тоа, пр. 5-10 минути по тема) учесниците/чките кои што учествувале во аквариумот се враќаат на своите места, и тогаш се задава нова тема така што повторно се повикува доброволец кој сака да дискутира на некоја од другите теми…

Теми:

  • Образовен систем; турбо-фолк музика; хип-хоп; дискриминација во училиштето; фудбал; предметот македонски јазик; Албанци, Роми, гардероба за излегување в град…

Може во текот на процесот, некој од учениците сам да напише на лист тема и кога ќе дојде време за нова тема да ја стави во аквариумот и да се дискутираа на неа.

За оваа возраст доволно е 5 минути од тема. Ако се работи техниката со поголема возраст (средно образование) тогаш може 10 минути. ВАЖНО Е НАСТАВНИКОТ ДА НЕ СЕ МЕША ВО РАЗГОВОРОТ. Учениците на почетокот имаа тешкотија да се замислат себе си во аквариумот, па често се вртеа кон мене, и мене ми зборуваа. Но кога им објаснив дека во аквариумот имаат сигурен простор и говорат само тие што се внатре, и јас се повлеков и седнав во толпата од ученици, аквариумот почна да функционира.

Во дискусијата наставникот може да искаже свое мислење само ако седне на едно од четирите столчиња и стане учесник во аквариумот.

Единствена негативност која што ја забележав е дека оваа активност неколку ученици не ги интрересираше. Односно немаа храброст да седнат во акватиумот и да дискутираат. Препорака до наставниците кои ќе ја работат, да забележат кои ученици не се вклучиле, па на наредните часови да најдат начин да ги извлечат нивните размислувања, и да ги охрабрат да зборуваат гласно. Бидејќи неколкумината кои не зборуваа денес, се навистина интелигентни ученици и имаат што да кажат…

Пробајте, во рефлексијата со учениците чув многу позитивни критики и желба повторно да го направиме.

Учество на проектот: „Поддршка на процесот на интегрирано образование во училиштата”

mojataucilnica Безимени, Мировно образование, Проекти, Училишни вести

IMG_3960

Во четвртокот попладнето заврши еднонеделниот тренинг-семинар кој беше наменет за контекстуална обука за изградба на мир на наставници и стручни соработници. На еднонеделната обука учествуваа 22 наставници и стручни соработници. Вклучени беа осум училишта: ООУ „Вук Караџиќ“ – Куманово; ООУ „Наим Фрашери“- Куманово; ООУ „Климент Охридски” – Прилеп; ООУ „Лирија” – с. Житоше, Долнени; ООУ „Хасан Приштина“ – Чаир, Скопје, Врапчиште; ООУ „Сали Лиси“ – Добри Дол Гостиварско; ООУ „Наим Фрашери“ – с. Неготино, Гостивар и ООУ „Јан Коменски“ – Карпош, Скопје.

Главна цел на проектот: Процесите на интегрирано образование, зајакнати во училиштата и со зголемена јавна поддршка, даваат придонес кон мирот и стабилноста на државата.

Специфични цели:

  • Испитување на можностите за развој на процесот на меѓуетничка интеграција во образованието (МИО) преку давање поддршка на училиштата кои се заинтересирани за напредок на овој компликуван процес
  • Зголемени капацитетите на наставниот кадар и стручните служби во училиштата за спроведување на активности поврзани со меѓуетничка интеграција во образованието (МИО)
  • Развиен прирачник како поддршка во работата на наставниот кадар за имплементација на МИО работилници
  • Препораки за политики во образовните институции, развиени заедно со целната група, за имплементирање во интегрираниот образовен систем;
  • Зголемување на јавната поддршка за интегрирано образование.

Носител на проектот: Здружение Мировна акција во соработка со Центарот за мировни студии од Хрватска.

Главен финансиер на проектот: Делегација на Европската Унија во Република Македонија.

Впечатоците се неописливи. Програмата беше интерактивна, разновидна и многу интересна. Преполна со искуствени работилници, дискусии, работа во групи, теоретски импути, презентации… Тренерскиот тим беше на нивото. Секогаш заедно со нас, постојано присутни на сесиите и надвор од нив. Посветени и желни навистина процесот на МИО – тоа да успее. Групата беше мотивирана, иако различна по многу работи: пол, религија, етничка припадност, вредности, убедувања… баш изгледаше како нашата заедничка Македонија. И тоа дружење покажа дека можеме заедно да најдеме решение да ни биде убаво.

Во исчекување на натамошните чекори од проектот… се радувам што бев дел од ова случување и чест ми е да продолжам да работам со овие луѓе, со кои ја делиме истата цел: ПОДОБРО УТРЕ ЗА СИТЕ НАС!!! IMG_3812

Прво место на конкурсот за иновативни практики за МИО

mojataucilnica Мировно образование, Проекти, награди

 

 

Постерот од активноста:    We-are-Making-a-Childrens-Magazine

Денес бев дел од една убава манифестација: Фестивал на иновативни практики. УСАИД во соработка со МЦГО направија 450 наставници од Македонија да се чувствуваат пријатно. Ја имав таа среќа да бидам една од нив, и не само една од нив, да бидам прва, да добијам признание, чест, почит, награда за мене и за моето училиште.

Ми беше чест да бидам дел од фестивалот. Браво за УСАИД и МЦГО, браво бидејќи ги согледаа работите за кои многумина немаат храброст да зборуваат. Браво за проектот „Меѓуетничка интеграција во образованието“, за неговата идеја, за целите кои ги има поставено и за капацитетите што ги гради.

Потребата за овој проект е од суштинско значење. Таа е во доменот на изградба на мир во нашата земја. Македонија е земја во која живеат различни етникуми, различни култури и религии. Тој факт не треба да нè уплаши, да нè спреми да се повлечеме во нашите идентитети, туку треба да нè поттикне, да нè предизвика да работиме заедно. Да градиме иднина која нема да личи на оваа наша страшна сегашност.

Сведоци сме на сегрегација во училиштата, на гетоизираност по етничка и верска основа. Живееме во исти градови, во исти села, во иста земја и не можеме да се разбереме меѓу себе. Сликата за „другиот“ е секогаш негативна и полна со предрасуди и стереотипи. Не сме го запознале „другиот“, а веќе собираме аргументи дека „тој“ навистина е зол.

Ако вака продолжиме, не 2001, ќе нè стигни нешто многу полошо. Ќе се изгубиме себе си, земјата, сè што сме граделе и создавале. Ќе се збришеме сите, без разлика на верата и етничката припадност.

Затоа МИО-то е од огромно значење за иднината на нашите деца, за нашата иднина.

Ги храбрам Министерството и Бирото за развој, поинтензивно да ја имплементираат Меѓуетничката интеграција во училиштата. Да работат на изградба на капацитети. Потребно е неформално образование за наставниците. Потребна е едукација за методологијата на работа, но пред сè и над сè е најважна сензибилизацијата на наставниците и стручните соработници. Ние треба да знаеме што е тоа дискриминација, стереотип, предрасуди, да се преиспитаме себе си, кои се нашите слики за другите, како до изградба на мир… па потоа, можеме тоа да го пренесеме на децата.

Предметот македонски јазик е еден од најподатливите наставни предмети во кој може многу лесно да се имплементираат различни теми. Токму поради тоа, јас со голема леснотија вметнувам теми од мировното образование и редовно ги споделувам на интернет.

Мојата скромна едукација во темите поврзани со мировното образование, соочување со минатото, разрешување конфликти, ненасилство и сл. ја имам стекнато во основни и напредни тренинзи за изградба на мир од здруженијата: „Мировна акција“ – Прилеп-Тетово и Центар за ненасилна акција – Белград-Сараево. Овие тренинг програми топло им ги препорачувам на сите кои сакаат да бидат иновативни и успешни во процесот на мултиетничката интеграција.

Самостојна мултикултурна активност: ПРАВИМЕ ДЕТСКО СПИСАНИЕ

mojataucilnica Медиумска култура VI, Мировно образование, Проекти, Шесто, награди

Ова е часот со кој учествував (заедно со VI – 1 одделение) на конкурсот произлезен од проектот на УСАИД за меѓуетничка интеграција во образованието имплементиран од страна на Македонски центар за граѓанско образование. Часот ќе биде дел од Фестивалот за иновативни практики за меѓуетничка интеграција во образованието: „Преку иновација до подобра интеграција”.

Комуникациски дијалог – работилница: Активно слушање

mojataucilnica Изразување и творење VI, Мировно образование, Шесто

Во склоп на наставната едница: Комуникациски дијалог со учениците од шесто одделение направивме работилница за активно слушање. Учениците искуствено се запознаа со правилата и начините на општење. Еве како течеше часот:

Наставничката ги дели учениците на парови. Најчесто пар се оние што седат во клупа, но ако има потреба може да направи парови со разместување.

Учениците имаат задача да разговараат на тема: МОЈАТА ПРВА ТЕПАЧКА ИЛИ КАВГА. Но кога едниот зборува, другиот не смее ништо да кажува ниту да прашува, слуша внимателно и се обидува да запомни сè што кажал неговиот партнер. Значи едниот ученик почнуваат со раскажување за својата прва тепачка или кавга, партнерот го слуша внимателно, штом заврши, парафразира, прераскажува, повторува што слушнал и чека потврда од партнерот дали сè запомнил како што е кажано. Потоа се прави истото, но во обратен редослед.

На овој начин учениците директниот исказ го претвораат во индиректен и истовремено учат како да бидат добри слушатели, како активно да слушаат.

Откако ќе завршат, зборуваат на темата КАКО ГО ДОБИВ ИМЕТО ИЛИ ПРЕКАРОТ. Но сега, нема знак, може да почне кој сака и меѓусебе може да си поставуваат прашања поврзани со темата.

Третата тема е САКАМ ДА СЕ ТИ СЕ ПОЖАЛАМ ЗА… но сега по еден од парот доаѓа кај наставничката и добива задача кога неговиот партнер ќе почне да раскажува, тој/таа да не го слуша, да се прави дека го слуша и да се занимава со нешто друго.

Целиот процес е опсервиран од една ученичка која подоцна ќе даде свое мислење за однесувањето на учениците.

Откако трите активности ќе завршат, наставничката поставува прашања и отвора дискусија:

ДИСКУСИЈА:
Прашања за тие што раскажуваа:
1. Како се чувствувате?
2. Дали ви значеше да бидете слушнати?
3. Дали се обидовте да го привлечните вниманието на вашиот соговорник?
4. Што би направиле за да бидете слушнати?
Прашања за тие што „слушаа“:
1. Дали ви беше интересно тоа што ви се раскажуваше?
2. Дали се преправавте дека слушате?
3. Зошто не му кажавте на соговорникот дека ви е досадно?
4. Дали требаше да му речете на соговорникот дека ви е досадно?
Прашања за сите:
1. Каде можеме да сретнеме ваков вид комуникација?
2. Зошто тоа е така?
3. Зошто не слушаме активно?
4. Што подразбираме под активно слушање?

Потоа заеднички се доаѓа до следните заклучоци:

ШТО ПРАВИ ДОБРИОТ СЛУШАТЕЛ:

  • Не прекинува,
  • го гледа соговорникот в очи,
  • не напаѓа,
  • не зборува за себе си,
  • слуша заинтересирано и стрпливо
  • остава тишина во паузите во кои соговорникот размислува
  • го прифаќа тоа што го зборуваш
  • не наметнува свои ставови
  • се смешка
  • охрабрува со гестови и мимики
  • дава поддршка
  • не навредува и не омаловажува
  • не се прави паметен.

 

 

МИО – активности

mojataucilnica Литература VI, Мировно образование, Училишни активности, Шесто

2015-11-24 09.20.33

Денес една група од наставници и ученици заедно со СИТ-от на училиштето бевме на гости кај нашето партнер училиште „Пере Тошев“ од с. Десово. Целта на нашата посета беше реализација на заеднички активности во рамките на наставниот процес. Мојата активност беше реализација на наставната единица: Пејзажни песни. Заедно со наставничката Зулфије Јусуфи одржавме двојазичен час. Имавме 14 ученици, 7 Албанчиња, 7 Македончиња.

Активностите беа пред се` во насока на запознавање на децата и другарување, а потоа и на совладување на наставната единица. Искуството беше незаборавно. И за нас наставничките и за дечињата. Еден обичен, едноставен час може да биде пример за цело човештво, за тоа дека многу лесно можеме да бидеме заедно, да се дружиме, да спроведуваме активности, сеедно од која националност сме, сеедно која вера ја имаме. Овие дечиња го покажаа тоа. Еве производ од таа активност:

По повод „Денот на албанската азбука“ училиштето имаше пригодна програма на која настапија ученици од трите етнички заедници: македонска, албанска и бошњачка. Нашата ученичка Васе Колароска се претстави со песната „Химната на децата“ од Есад Бајрам

 

ПОСЕТА НА ДРУШТВОТО ЗА СЛЕПИ И СЛАБОВИДНИ ЛИЦА

mojataucilnica Мировно образование, Осмо, Училишни активности

2015-10-30 13.34.28

По повод Месецот на книгата, учениците од ООУ „Климент Охридски“, членови на додатната настава по македонски и англиски јазик и членовите од литературната секција од училиштето, заедно со дефектологот Светлана Миоковиќ –Томеска, наставничките Весна Јонзоска, Билјана Наумоска-Шукуроска и Јулијана Талеска го посетија Друштвото за слепи и слабовидни лица.

This slideshow requires JavaScript.

Ќе зборувам во прво лице, бидејќи сум полна со емоции. Очекував една обична средба на која ќе видиме книги со браева азбука, ќе се сликаме и ќе си одиме… ама видов и доживеав и јас и учениците и наставничките, работи кои вреди да се споделат:

Средбата со Благоја Мисовски, Љубен Спиркоски и особено со Марија Арсова беше несекојдевен настан. На почетокот бевме топло примени во една скромна и мала соба во Центарот за социјални грижи. Домаќините беа многу радосни на гостите, беа гостопримливи и отворено одговараа на сите прашања. Ни ги претставија предметите кои им го олеснуваат животот и помагаат да се интегрираат во општеството. Видовме топки за фудбал, часовник, шах, прибор за геометрија, браева машина за пишување, книги на браево писмо и слушнавме аудио книги. Марија ни демонстрираше како се пишува на машината, ни кажа за буквата А, ни нацрта тријаголник, поигравме шах…

Од нејзината отвореност, искреност и леснотија на презентирање на нештата, сите ние увидовме дека тие луѓе се исти како нас, единствено имаат поинаков пристап кон нештата. Допирот е нивното сетило. Гледајќи ја Марија како демонстрира, на моменти не бев сигурна дали навистина е слепа или така ми се чини. Таа толку успеала да се носи со слепилото што и на дело покажа дека нема никаква разлика со нас – кои гледаме. Оваа средба и разговорот со неа покажа дека не гледаме доволно, не ги гледаме квалитетите на луѓето… имаме предрасуди и секогаш сме со резерва кои оние кои имаат различни пристапи кон светот. Оваа посета растреси многу работи кај нас: кај мене, кај децата…

Им благодарам за приемот. Им ветуваме дека ќе направиме напори со учениците да снимиме неколку песни и текстови и ќе ги донираме во нивната звучна библиотека и ќе ги посетуваме почесто.

Јулијана Талеска

наставничка по македонски јазик

ЛИНИЈА НА ПРИЈАТЕЛСТВОТО

mojataucilnica Мировно образование, Осмо, Училишни активности

2015-10-26 15.36.30

Сите стојат во круг. Почнува еден ученик со тоа што кажува каде ја фрла топката (кон некој друг ученик/ученичка) и при тоа кажува некоја позитивна особина или нешто добро што направил ученикот кон кого што ја фрла топката. Ако еднаш некој фрлил топка кон едно дете, тоа дете не може повеќе да прима топка и од другите деца.

Continue reading →

Поим за социјални песни

mojataucilnica Литература VIII, Мировно образование, Осмо, на час ,

index
Учениците имаа задача дома да поразговараат со родителите, гугал, википедија или некој близок за следниве поими:
Continue reading →

Драмската секција со ново видео: „Сите деца со исти права за подобро утре“

mojataucilnica Драмска секција, Мировно образование, Проекти, Училишни активности

Драмската секција во соработка со СЕГА – коалиција на младински органзации и Песталоци – детската фондација сними кратко видео во кое ги промовираше детските права. Видеото беше промовирано во петокот во училиштето „Климент Охридски“ пред наставниците, учениците и родителите.

http://www.zenitprilep.com.mk/petka/8944-detski-prava-za-podobro-utre.html

https://www.youtube.com/watch?v=S27hB6n5lHs